Övertorneån kunta oon itäsessä Norrbottenissa, komeasti Tornionväylän rannala. Napapiiri kulkee kunnan pohjospuolen läpi ja kunnanraja iässä oon osa mailman rauhalisinta raijaa – Suomen ja Ruottin raja.
Meilä oon halpa kuntavero (21:53 kruunua), halpa asua ja muutenki matalat maksot. Meän tahalinen priuriteerinki, ette esikoulussa (förskola), koulussa ja vanhuksitten hoijossa oon paljon pärsunaalia, tekkee ette meän palvelut kunnan asukhaile oon hyvvää kvaliteeta. Yks esimerkki meän pystyvyyestä oon ette Opettajaliitto (Lärarförbundet) vuona 2006 valitti meät Ruottin parhaaksi koulukunnaksi. Monta vuotta ennen sitä met olima olhee toisela siala. Vuona 2007 met tulima kunniakhaale neljänelle tilale. Ko vanhemat saava päättää, Övertorneån kunnan peruskoulu oon kolmanella tilala maan kouluista. Helposti saattas alkaa kehuhmaan, ko oon semmoset tulokset!
Rakenus kuvassa oon kunnan lukio, Gränsälvsgymnasiet, kunnan keskustassa. Kunnalisitten kouluitten lisäksi meilä oon Hietaniemen vappaa-koulu jossa oon toimintaa 0-9 vuotihaile.
Elinkeinoelämän klimaatti (Näringslivsklimat)
Justhiinsa nyt oon menheilä suuri ja intensiivi työ ette parantaa elinkeinoelämän klimaattia kunnassa. Työn tarkotus oon kehittää yrittämistä ja stimyleerata siihen ette uusia yrityksiä perustethaan. Yks osa tästä oon ette Övertorneån kunnan kasvukontturi (tillväxtkontor) oon startanu kesälä 2008.
Rajanylittävä kulttuuri
Matarengissä ihmiset oon aina elähnee lähheisessä yhtheistyössä väylän kans. Väylä oon ollu tärkeä transportitten vuoksi ja siittä oon kans saanu tuloja ko siinä oon niin paljon kallaa. Seu´ula oon paljon joppausjuttuja jokka kertova miten kaikenlaisia tavaroita luattomasti oon kuljetettu rajaväylän yli.
Seu´ula puhuthaan ruottin ja suomen kielitten lisäksi tornionlaaksonsuomea, eli meänkieltä. Meänkieli oon rohki tärkeä paikkakuntalaisile ja se nähhäänki parhaana kulttuurin kantajanna täälä. Vuona 2000 meänkieli hyväksythiin minuriteettikieleksi Ruottissa. Övertorneån kunta kuuluu minuriteettikielitten, meänkielen ja suomen, hallintoaluheesheen. Övertorneån kunnan eri hallinoissa (förvaltningar) meänkieli ja suomi oon eläviä kieliä. Se tarkottaa ette joka osastolla aina oon joku joka ossaa ja saattaa komyniseerata sujuvasti kummalaki kielelä.
Rajanylitys näkkyy kans elinkeinoelämässä ja yhtheistyötä krannikunnan Ylitornion kans Suomen puolela oon paljon. Suomalais-ruottalaisessa turisti-informasjuunissa pärsunaali mielelhään lutsaa sinut oikeihin paikhoin ympäristössä.
Jeugrafii, asukhaat ja organisasjuuni
Övertorneån kunnan pinta-ala oon 2.374 km2 ja meilä oon 5.090 asukasta (1. nuvemperi-/marraskuuta 2007). Kunta oon jaettu kolhmeen seurakunthaan; Svanstein, Övertorneå ja Hietaniemi, mutta vuenvaihtheesta 2005/2006 net oon yhistetty ja niistä tuli Övertorneån seurakunta.
Vuosina 2007-2010 Övertorneån kunnanvaltuustossa oon 35 paikkaa, jokka oon jaettu seittemälle puoluheele. Kunnalisneuos oon är Linda Ylivainio (c).
Tuotheita Övertorneån kunnasta markkinoihaan nimelä ”Polcirkelland/Napapiirimaa". Kunnassa oon monta taimitarhaa (handelsträdgård) ja kukkia kylväviä yrityksiä joila mennee hyvin. Paikalinen värsta-teolisuus muuttelee raskhaampia ajoneuoja, rakentaa niistä uusia ja tekkee kans plastiikkituotheita, daattakaapelia ja energii-komponenttiä. Paikalinen transportti-elinkeino ja kauppa-ala oon perintheisesti laaja. Optofiber-verkko oon veetty monhiin kunnan kylistä.
Vuosina 2002-2004 kunnassa alotethiin yks kehitysprujekti joka oon saanu paljon huomiota. Sen nimi oon Expedition Övertorneå ja se loppu vuenvaihtheessa 2005/2006.